آوا - د پکتیا د مچلغو بند د پروژې کار به راتلونکی کال پیل شي

د پکتیا د مچلغو بند د پروژې کار به راتلونکی کال پیل شي

د انرژۍ او اوبو وزارت اعلان کړی چې د دغه وزارت سرپرست د پکتیا ولایت له مشرانو سره په لیدنه کې ویلي چې د مچلغو بند د پروژې کار او په راتلونکي کال کې به په دغه ولایت کې د برېښنا د پروژو د تطبیق چارې پیل شي.

آوا: د اسلامی امارت د انرژی او اوبو وزارت مطبوعاتي دفتر څخه په خپره شوې خبرپاڼه کې راغلي چې د دغه وزارت سرپرست ملا عبداللطیف منصور د پکتیا ولایت له مشرانو سره وکتل.

د انرژۍ او اوبو سرپرست وزیر وايي، د مچلغو بند پروژه به په راتلونکي کال کې د لازمو اسانتیاوو په برابرولو سره پیل شي.

هغه زیاته کړه، د مچلغو بند د وزارت په راتلونکي پلان کې شامل شوی او د پروژې اسنادو ته یې لازمې څېړنې روانې دي.

د انرژۍ او اوبو سرپرست وزیر دا هم وویل چې په راتلونکي کال کې به په پکتیا ولایت کې هم د برېښنا د پروژو د تطبیق چارې پیل شي.

د مچلغو د برېښنا بند د هېواد په جنوب ختیځ کې د اوبو د زېرمه کولو له مهمو پروژو څخه دی، چې په هېواد کې د اسلامي امارت له واکمنۍ وروسته یې د جوړېدو چارې نیمګړې پاتې شوې.