د کډوالو او راستنیدونکو چارو وزارت اعلان کړی، چې د دغه وزارت او یو شمېر بنسټونو ترمنځ د ۹ میلیونو ډالرو په ارزښت د همکارۍ ۴ تفاهم لیکونه لاسلیک شوي دي.

آوا: د اماراتو د مهاجرینو او راستنیدونکو چارو وزارت مطبوعاتي دفتر نن (پنجشنبه د میزان ۱۲مه) د یوې خبرپاڼې په خپرولو سره له بېلابېلو ادارو سره د څلورو قراردادونو د لاسلیکیدو خبر ورکړ.

په خبرپاڼه کې راغلي دي چې د همکاریو دغه تفاهم لیکونه د مهاجرینو او راستنیدونکو چارو وزارت او د روغتیا د بیارغاونې د بنسټونو، افغان ټولنې او د ناروې د پلاوي ترمنځ لاسلیک شول.

دغه وزارت زیاتوي، چې دغه ۴ قراردادونه نږدې ۹ میلیونه ډالره ارزښت لري او پر بنسټ یې د هېواد په بېلابېلو ولایتونو کې له ګڼو هېوادوالو سره نغدي او غیر نغدي مرستې کېږي.

تر دې مخکې د کډوالو او راستنیدونکو چارو وزارت له اړمنو سره د مرستو په موخه له یو شمېر بنسټونو سره د همکارۍ تړونونه لاسلیک کړي وو.